" အရုပ်တွေနဲ့ ရေးတဲ့စာ "

" အရုပ်တွေနဲ့ ရေးတဲ့စာ "   (16.8.13 . The Voice Daily)


                       ငယ်ငယ်ကတည်းက စာအုပ်၊ စာစောင်တွေ လှန်မိရင် ပထမဆုံး ကာတွန်းတွေကို ကြည့်မိတာမျိုးပါ။ စာမတတ်ခင်ကတည်းက ပုံကြည့်လာကြတာကိုး။ ကာတွန်းတွေက ကျွန်တော်တို့အပေါ် တော်တော်လွှမ်းမိုးခဲ့ပါတယ်။

                      အခုဆိုရင် ကာတွန်းတွေ လှိုင်လှိုင်ပေါများလာပါပြီ။ ကာတွန်းဆရာအသစ်တွေနဲ့ စိတ်ကူးလတ်လတ်ဆတ်ဆတ်တွေ အလွယ်တကူပဲနေရာရလာကြတာ တွေ့နိုင်ပါတယ်။ ကြားထဲကတစ်ခေတ်မှာတော့ ရိနွမ်းပျက်စီးနေတဲ့ ကာတွန်းမျိုးတွေပဲ လူမြင်သူမြင်ရှိခဲ့တာဆိုတော့ အခုအချိန်ဟာ ကာတွန်းလောကအတွက်တော့ အချိန်ကောင်းပါပဲ။ နေ့စဉ်သတင်းစာများလည်း ရှိလာပြီဖြစ်တဲ့အတွက် ကစားကွင်းပိုကျယ်လာပါတယ်။
                       ပိုကျယ်လာတဲ့ကစားကွင်းထဲမှာ ဘယ်လိုကစားကွက်တွေနဲ့ ဘယ်လိုအမူအကျင့် စရိုက်လက္ခဏာတွေနဲ့ ဆက်ကစားသွားကြမှာလဲ ဆိုတာလည်း အရေးပါလာတယ်လို့ထင်ပါတယ်။ ဥပဒေပ ကစားမယ့်သူတွေ ၊ စိတ်ဓါတ်နိမ့်ပါးသူတွေ ၊ ၀မ်းစာမပြည့်သေးသူတွေ မျိုးစုံလည်း ပါဝင်လာနိုင်တယ် မဟုတ်ပါလား။

                      'အဆိပ်အတောက်ရှိတဲ့စာ' ဆိုတာမျိုးကို တစ်စုံတစ်ရာအတိုင်းအတာအထိ ရင့်ကျက်ပြီးသူများက အလွယ်တကူပဲသိနိုင်ကြပါတယ်။ အဆိပ်အတောက်ရှိတဲ့ကာတွန်းမျိုးကတော့ ပုံလှလှလေးတွေ၊ ရယ်စရာပြုံးစရာလေးတွေနဲ့ ဆေးခါးကို သကြားလူးထားသလိုမျိုးရှိတတ်ပါတယ်။ ဆေးခါးမဟုတ်ပဲ တမြည့်မြည့်လှိုက်စားတတ်တဲ့ အဆိပ်မျိုးသာဖြစ်ခဲ့ရင် အားလုံးအတွက် အန္တရာယ်ရှိပါတယ်။

                       လွန်ခဲ့တဲ့ လအတန်ကြာက အစိုးရနဲ့ တိုင်းရင်းသားလက်နက်ကိုင်တွေ ငြိမ်းချမ်းရေးဆွေးနွေးပွဲ စကြတဲ့အချိန်မှာ နာမည်ကြီးမီဒီယာကြီးရဲ့ဂျာနယ်မှာဖော်ပြထားတဲ့ ကာတွန်းတစ်ကွက်ဆိုရင် မှတ်မိနေပါတယ်။ ခေါင်းပေါင်းနဲ့ ဗမာကြီးရယ် ၊ ဒုံးယိမ်းအင်္ကျီနဲ့ ကရင်ကြီးရယ် ပုခုံးချင်းဖက်လို့ ၊ ကျောဘက်က နောက်လက်တစ်ဖက်စီမှာ ဓါး၊ လက်နက် ကိုယ်စီနဲ့။ ဘယ်လိုရည်ရွယ်ချက်နဲ့များ ရေးသလဲလို့ အကြိမ်ကြိမ်စဉ်းစားမိပါတယ်။ ဖော်ပြတဲ့မီဒီယာကရော ဘယ်လိုသဘောထား၊ ဘယ်လိုကျင့်ဝတ်ခံယူချက် နဲ့များ ဖော်ပြခဲ့သလဲလို့ အံ့သြမိပါတယ်။ မီဒီယာကြီးရဲ့ အာဘော်အတိုင်းရေးရင် ဖော်ပြခံရမှာပဲလို့ ယူဆပြီးရေးတဲ့သူမျိုးဆိုရင်တော့ ကာတွန်းဆရာကို ဘာမျှမပြောလိုတော့ပါ။ အရာရာကို အုပ်ထိန်းကွပ်ကဲရမယ့် မီဒီယာကြီးရဲ့တာဝန်သာ ဖြစ်လာတာမဟုတ်လားခင်ဗျာ။
                       မီဒီယာဆိုတာ " ငါ့ အယူ ၊ ငါ့ လမ်းကြောင်း ၊ ငါ့ ၀ါဒ .. အမှန် " ဆိုတာပြောဖို့လား ၊ တိုင်းပြည်ကောင်းအောင် ၀ိုင်းဝန်းပေးဖို့လားဗျာ။ အကြီးကြီး မပြောလိုပါ။ အများအတွက် အကျိုးယုတ်စေမှာမျိုးကိုတော့ လူသားတစ်ဦးရဲ့ မွေးရာပါကျင့်ဝတ်နဲ့တောင် ရှောင်ကြဉ်သင့်တယ်လို့ ထင်မိပါရဲ့။

                      ပြီးခဲ့တဲ့ခေတ်ရဲ့ နိုင်ငံပိုင်သတင်းစာ ဖွင့်ကြည့်လိုက်ရင် ဘုန်းတော်ဘွဲ့နဲ့ ဖော်လံဖား ကာတွန်းမျိုးတွေပဲ အမြဲတွေ့ရတော့ စိတ်မချမ်းသာပါဘူး။ ဒီနေ့ခေတ်ရဲ့ ပုဂ္ဂလိကသတင်းစာ၊ ဂျာနယ်များဖွင့်ကြည့်ပြန်တော့လည်း ကာတွန်း ၁၀ ခုမှာ ၉ ခုက အပြစ်ရှာ ၊ အဆိုးမြင် ၊ အကောင်းသုည ဆိုတာမျိုး မြင်ရပြန်တော့ ၀မ်းနည်းရပါတယ်။ ကျန်တဲ့တစ်ခုဟာ ၀ါရင့် သက်ကြီး ကာတွန်းဆရာကြီးတွေရဲ့ လက်ရာ ဖြစ်နေတတ်ပါတယ်။ ကျွန်တော်တို့လူမျိုးကပဲ ရက်ဒီကယ် (တစ်ဖက်စွန်းရောက်) စိတ်တွေ သိပ်များနေတာများလားခင်ဗျာ။ 'ဒါ' မဟုတ်ရင် 'ဟိုဟာ' ပါပဲ။ 'ဟိုဒင်း' ဆိုတာ မရှိစေရ။
                      တည့်မတ်ထိန်းကျောင်းဖို့ ၊ ထောက်ပြဝေဖန်ဖို့ ဆိုတာမှန်ပါတယ်။ အဲဒါဟာ အပြစ်ရှာဖို့ လို့တော့လည်း အဓိပ္ဖာယ်တိုက်ရိုက် မသက်ရောက်ဘူးလို့ထင်ပါတယ်။ သိပ်ပြည့်စုံလာတဲ့သူကို အပြစ်ရှာပြတာက တန်ဖိုးရှိပါတယ်။ မပြည့်စုံလွန်းမှန်း သိသာလှတဲ့သူကို အပြစ်သက်သက်ပြောနေတာကတော့ အကျိုးဖြစ်ထွန်းစေပါ့မလားလို့ စဉ်းစားသင့်ပါတယ်။ ကြိုးစားပြီး အားယူလမ်းလျှောက်နေတဲ့ ကလေးငယ်ကို လက်ခုပ်တီးပေးတာမျိုး၊ ခြေလှမ်းမှန်အောင် ထိန်းပေးတာမျိုးဟာ "လဲချည်းနေတာပါပဲကွာ"လို့ စိတ်ပျက်ရေရွတ်နေတာထက် ပိုအကျိုးမများနိုင်ပါလားဗျာ။
                       ပိုဆိုးတာကတော့ ကိုယ့်ကလေးလမ်းမလျှောက်နိုင်သေးတာကို ဘေးလူပါခေါ်ပြပြီး "ကြည့်ပါဦး ၊ လမ်းလျှောက်တာများ ပုံမကျပန်းမကျ" လို့ ၀ိုင်းကဲ့ရဲ့ပြစ်တင်တာမျိုးပါပဲ။

                       လူကြီးတွေဖတ်ပြီးလို့ တင်ထားတဲ့ ဂျာနယ်၊ သတင်းစာကို ကလေးတွေကယူပြီးရင် ပထမဆုံး ပုံကြည့်တာပါပဲ။ ကာတွန်းပုံကို ကလေးတိုင်းကြိုက်ကြတယ်ဗျာ။ စာဖတ်တတ်ခါစ ၊ အတွေးညဏ်ကွန့်မြူးခါစ ကျွန်တော်တို့မျိုးဆက်သစ်ကလေးတွေရဲ့ခေါင်းထဲမယ် 'ဘာ ဘာ ဘာမှမကောင်းဘူး' ဆိုတာမျိုး သွင်းပေးသလိုဖြစ်ရင် တော်ပါ့မလားဗျာ။ အရာတိုင်းကို အဆိုးမြင်တဲ့ရှုထောင့်ကနေ ကြည့်တတ်အောင် သင်ပေးသလိုမျိုးလည်း ဖြစ်နိုင်ပါသေးတယ်။
                

                          

                       ဘ၀အမောတွေကို ရယ်စရာလုပ်ပြီး ပြေလျော့စေလိုက်တာမျိုးဟာ ယဉ်ကျေးတဲ့လူ့အဖွဲ့အစည်းရဲ့ ဆေးဝါးတစ်မျိုးပါပဲ။ ဆေးဆိုတာမျိုးဟာ တန်ဆေး၊ လွန်ဘေး ဆိုတာမျိုးရှိကြောင်းကိုလည်း မမေ့စေချင်တာပါ။ 

                      ရုရှဟာသတွေဟာ သူတို့ရဲ့အကျည်းတန်ခဲ့တဲ့ ခေတ်တစ်ခေတ်ကို ရယ်စရာအသွင်ပြောင်းထားတဲ့ ရိုးရာဆေးဝါးတစ်မျိုးပေါ့ဗျာ။ လူကြိုက်များကြပါရဲ့။ ဒါပေမယ့် ဒီနေ့ခေတ် ရုရှလူမျိုးတွေရဲ့စိတ်ထဲမယ် သူတို့ရဲ့ကောင်းကောင်းမကျက်သေးတဲ့ အမာရွတ်တွေကို ပွတ်ပွတ်ကြည့်ရသလို ၊ သူတို့ဖင်ပေါ်တုန်း အရိုက်ခံထားရတဲ့ဓါတ်ပုံလို ခံစားကြရပါသတဲ့။

                      ငယ်ငယ်က စာမတတ်ရင်ဘာဖြစ်မလဲလို့ ဆရာမကမေးတော့ သူငယ်ချင်းတစ်ယောက်က စာမတတ်ရင်ပုံကြည့်ရမယ်လို့ ပြန်ဖြေတယ်။ စာမဖတ်တတ်သေးတဲ့ ကလေးတွေ ၊ စာမဖတ်တတ်သေးတဲ့ လူကြီးတွေ ၊ စာကို ညဏ်နဲ့ယှဉ်ဖတ်ပြီး ဆင်ခြင်နိုင်စွမ်း မရှိသေးတဲ့သူတွေ အားလုံးက ပုံတော့ကြည့်တတ်ကြပါတယ်။ သူတို့ခံစားတတ်တဲ့ နှလုံးသားနဲ့ ၊ သူတို့စဉ်းစားတွေးခေါ်နိုင်တဲ့ ဦးနှောက်နဲ့ သူတို့တတ်သလို ခံစားကြမှာပါပဲ။

                      အရုပ်နဲ့ရေးတဲ့ စာတွေဟာ အားဆေးမဟုတ်ရင်တောင် အဆိပ်အတောက်ကင်းကင်းနဲ့ သကြားအုပ်ထားတဲ့ "ဆေး" တွေပဲ အမြဲဖြစ်စေချင်မိတယ်။


(ယက္ခ) ရဲကြီး ။ ၂၅.၇.၁၃ ။ (16.8.13 . The Voice Daily)

https://www.facebook.com/yekkha.yejee

https://www.facebook.com/yekkha.yegyii.fanpage