Wednesday, September 4, 2013

" အပျင်းပြေ _ ၄"

" အပျင်းပြေ _ ၄"

                      မိုက်ဖူးကြလားဗျ။ ကျွန်တော့် ဘော်ဒါတစ်ယောက်ဆို တကယ်မိုက်တယ်။ လူပုံက ဖြူဖြူနွဲ့နွဲ့နဲ့ မျက်နှာက အမြဲပြုံးနေတာ။ မိုက်မယ်ကို မထင်ရတာမျိုး။ သဘောကလည်း ခပ်ကောင်းကောင်း။ အင်း .. ဘော်ဒါ ဆိုပေမယ့် နည်းနည်းတော့ကြီးပါတယ် .. တက္ကသိုလ်မှာ စီနီယာ ဂျူနီယာပေါ့ဗျာ။
                      တခါဆို သူများဆိုင်ကယ်တစ်စီး လှလှလေးကို ခဏစီးမယ်ဆိုပြီး ယူမောင်းသွားတာ။ အဲဒီတုန်းက ဆိုင်ကယ်လုံးဝစီးလို့ မရဘူးလေ။ jumping bike အမိုက်စားလေး ဆိုတော့ ပိုင်ရှင်လည်း ရင်တမမနဲ့ တမျှော်မျှော်လုပ်ရတာ နာရီဝက်လောက်ကြာတယ်။ ပြန်ရောက်လာတော့ ချွေးသံတရွှဲရွှဲနဲ့ .. ရော့ ၊ ပြေးတော့ တဲ့။ ဘာ .. ဘယ်လို ဆိုတော့။ မော်တော်ပီကယ်ကလိုက်ဖမ်းတာတဲ့။ ရဲက BMW ကြီးနဲ့ မြို့ထဲလမ်းမှာ ဘယ်လွတ်ပါ့မလဲ။ ပြေးမလွတ်တော့လို့ မော်တော်ပီကယ်ရော ဆိုင်ကယ်ရော မြောင်းဘေးမျှားခေါ်ပြီး ကန်ချထားခဲ့ရသတဲ့။ အခုမော်တော်ပီကယ်ရော ဆိုတော့ .. မြောင်းထဲမှာ တဲ့။ ကျွန်တော်တို့တွေ ရီရမလို ၊ ငိုရမလို။

                      တခါတော့ အဆောင်မှာ ဖဲဝိုင်းရှိတဲ့ တစ်ညပေါ့။ ကျောင်းသားနည်းနည်းနဲ့ အပြင်လူတွေလဲပါတယ်ဗျ။ အပြင်လူတွေထဲက တစ်ယောက်က ခပ်ကျယ်ကျယ် ၊ ခပ်ဟော့ဟော့ ဆိုပါတော့ဗျာ။ နှစ်မြို့ဖွယ် မရှိဘူးဗျ။ လူကောင်က ထွားထွားနဲ့ ၊ အထက်စီးလေနဲ့ ၊ ညစ်ညမ်း ဘမ်းစကားတွေလှိုင်လှိုင်သုံးပြီး ဟောင်ဖွာဖွာနဲ့ပေါ့ဗျာ။ အထက်စီးလေသံနဲ့ပဲပြောတတ်တဲ့လူမျိုးဗျာ .. သိတယ်မဟုတ်လား .. အကြောင်းမဲ့ ကျော်ခွပြီး ဆရာကြီးအထာလိုလို လူတွင်ကျယ်လိုလိုပေါ့။ မြင်မှာပါ။ . . . အဲ ဒီလူက အကုန်လုံးကို အဲဒီလို အထာနဲ့ စီးနေတဲ့အထဲ ကျွန်တော့်ဘော်ဒါကိုလည်း ခပ်ထေ့ထေ့ရိတယ်ဗျ။ ကျွန်တော့်ဘော်ဒါကလည်း အမြဲပြုံးပြုံးနဲ့ဆိုတော့ အဆိပ်ရှိပုံလည်း မပေါ်ဘူးလေ။ တစ်ခါ နှစ်ခါ တော့ ဘာမှပြန်ပြောတာ မတွေ့ပါဘူး။ ဖဲဝိုင်းဆိုတာကလည်း ရိလုံး ထေ့လုံးတွေ အမြဲရှိတဲ့ နေရာမျိုးမဟုတ်လား။ အဲ .. ငါးခါမြောက်လောက်မှာ ဒီလူ့ထေ့လုံးက အဆဲလေး စွက်လာတယ်။ ကျွန်တော့်ဘော်ဒါက တချိန်လုံးပြန်မပြောရာကနေ "ဟေ့ကောင် တိတ်တိတ်နေစမ်းကွာ ၊ အာရုံမနောက်နဲ့ ၊ -ီးပဲ " လို့ ခပ်ပြတ်ပြတ် ဆဲရော။ ဒီမှာတင် ဟိုလူက ထကြမ်းပါလေရော ဆဲတာတွေရော ၊ ငါ့ကို ဘာကောင်ထင်သလဲ ဆိုတာတွေရော ၊ ဘယ်လောက်မိုက်သလဲဆိုတဲ့ ချဲလင်းတွေရော ၊ မအေတွေ နှမတွေရော .. လက်ညှိုးငေါက်ငေါက်ထိုးပြီး စားတော့ဝါးတော့မတတ် ကြည့်လို့ ... အပီအပြင်ပွဲကြမ်းပါရောဗျာ။ ၀ိုင်းလည်း ရပ်သွားတာပေါ့။ ကျွန်တော့် ဘော်ဒါလည်း ဘာမှပြန်မပြောပဲ ထထွက်သွားတယ်။
                      ပိုဆိုးသွားပါလေရော။ ထသွားတဲ့နောက်ကိုလှမ်းပြီး အတုံးလိုက်အတစ်လိုက် ဆဲလို့။ ပစ္စည်းတစ်ခုတောင် ကိုင်ပေါက်လိုက်သေး။ အဲ .. သူဆဲနေတုန်း ကျွန်တော့်ဘော်ဒါက ပြန်ဝင်လာတယ်။ လက်ထဲမှာ ကြက်သွန်လှီးတဲ့ ဓါးခပ်ငယ်ငယ် ပါလာတယ်။ မီးဖိုချောင်ထဲ သွားယူပြီးပြန်လာတာပဲ။ အကုန်တိတ်သွားတယ်။ တချို့ကလည်း အို ၊ ဟယ် ၊ ဘုရား ဘုရား ပေါ့လေ။ ကျွန်တော့်ဘော်ဒါက ဘာမှမပြောပဲ ဓါးကို သူနဲ့ ဟိုပုဂ္ဂိုလ်ကြား နှစ်ယောက်လုံးလက်လှမ်းမီတဲ့ နေရာလောက်ပစ်ချလိုက်တယ်။ ပြီးတော့ ဟိုလူ့မျက်နှာကိုစေ့စေ့ကြည့်ပြီး တစ်လုံးချင်းပြောတယ်။
" အဲဒီမှာ ဓါး တွေ့လား . . . မင်းမကျေနပ်ရင် ကောက်ပြီး ငါ့ကိုထိုး ၊ ကောက်ပြီးရင်တော့ ပြန်မချရဘူး ၊ ထိုးဖြစ်အောင်ထိုးပေတော့ . . . ငါကောက်ပြီဆိုရင်လဲ မင်းကိုထိုးပြီလို့သာ မှတ်ပေတော့ . . . လုပ် . . မင်းကို ဦးစားပေးတယ် "
                      ဟိုလူ ဘာမှပြန်မပြောနိုင်ဘူးဗျ။ ပြူးကြောင်ကြောင်နဲ့ ကြည့်နေတာပဲ။ ခုဏကလို စိတ်ဆိုးမာန်ဆိုးပုံကတော့ လုံးဝ မရှိတော့ဘူး။
" အေး .. မကောက်ရဲရင် မင်းထွက်သွားလိုက်တော့ . . . အခုပဲ ထွက်သွားတော့ကွာ "
                      ဟိုလူ မလှုပ်ဘူး ၊ ပြူးကြောင်ကြောင်နဲ့ ဘေးက လူတွေကို လိုက်ကြည့်နေတယ်။
" ငါပြောတယ်နော် ... ဓါးကိုကောက်ရင်ကောက် ၊ မကောက်ရဲရင် ထွက်သွား ၊ ၂ ခုလုံးမလုပ်ရင်တော့ အဲဒီဓါးကို ငါကောက်တော့မှာ "
                      ဘေးကလူတွေကလည်း ငြိမ်လို့ ၊ ကြောက်တာပဲလား ၊ ပွဲကြည့်ချင်တာလားတော့ မသိဘူး။ ဟိုလူ့မျက်နှာ ချွေးပြန်လာတာတွေ့ရတယ်။ ကျွန်တော့်ဘော်ဒါက လှုပ်မယ့်ပုံပြင်တော့မှ " ခဏ . နေဦး . နေဦး . ခဏ " ဗလုံးဗထွေးပြောပြီး ခပ်သုတ်သုတ်ထထွက်တယ်။ ပိုက်ဆံအိတ်တောင် မေ့ကျန်ခဲ့လို့ ကောက်ပေးလိုက်ရသေးတယ်။

                      ဒီလူသူ့နားကဖြတ်တဲ့အချိန်မှာ ကျွန်တော့်ဘော်ဒါက ခပ်တိုးတိုးပြောလိုက်တယ်ဗျ။ ကျွန်တော်ကတော့ ကြားလိုက်တယ်။ " မှတ်ထား ဟေ့ကောင် ၊ ပါးစပ်နဲ့ မိုက်တာ အလွယ်ဆုံးပဲ " တဲ့။

                      အခု ဖတ်လာတဲ့ ခင်ဗျား သွေးဆူသွားပြီ မဟုတ်လား။ ရေးနေတဲ့ ကျွန်တော်လည်း သွေးဆူတာပဲ။ ဟုတ်တယ်လေ .. ပါးစပ်နဲ့ မိုက်တာ အလွယ်ဆုံးပဲ။ လက်နဲ့ မိုက်ဖို့က အဲဒီလောက် မလွယ်ဘူး။
                      အင်း ... လိမ္မာ ဖို့က ပိုပြီးခက်ပါတယ်ဗျာ။ ဘာနဲ့ပဲမိုက်မိုက် .. မိုက်တဲ့လူဆိုတာ လိမ္မာတဲ့လူထက်တော့ လွယ်ပါတယ်ဆိုတာ .. ကျွန်တော်လည်း ကြီးမှသိသိလာသလိုပါပဲ။ . . . ခုဏက ဆူနေတဲ့သွေးကို အခုပဲ ထိန်းလိုက်နိုင်ပြီဆိုရင် ခင်ဗျားကို ကျွန်တော် အထင်ကြီးမိမှာ အမှန်ပါပဲ။

                      လိမ္မာ ဖို့က ခက်ပါတယ်ဗျာ။ ခက်တာတွေကို လုပ်နိုင်မှသာ လူတော် မဟုတ်လား။ ပိုခက်တာတွေကို ပိုတော်တဲ့လူတွေကပဲ အမြဲလုပ်နိုင်ကြတယ်ဗျ။ ။


(ယက္ခ) ရဲကြီး ။ ၃၁.၈.၁၃ ။

https://www.facebook.com/yekkha.yejee

No comments:

Post a Comment